ನಾಬೊತಾಚಿ ಖುನ್, ಅರಾಮ್’ಗಾರಾಂ ವಿರೋಧ್ ಝಜ್ I 1 ರಾಯ್ / 1 Kings 21: 11-22:12
11. ತ್ಯಾ ಶಹರಾಚ್ಯಾ ಮನ್ಶಾಂನಿ, ಮ್ಹಣ್ಜೆ ನಾಬೊತಾ ಸವೆಂ ವಸ್ತಿ ಕರ‍್ತಲ್ಯಾ ಮಾಲ್ಗಡ್ಯಾಂನಿ ಆನಿ ಪ್ರಧಾನ್ ನಾಗರಿಕಾಂನಿ ಜೆಜೆಬೆಲಾನ್ ತಾಂಕಾಂ ಧಾಡ್‌ಲ್ಲ್ಯಾ ತ್ಯಾ ಪತ್ರಾಂನಿ ದಿಲ್ಲೆ ಆಜ್ಞೆ ಪರ್ಮಾಣೆಂ ಕೆಲೆಂ.
12. ತಾಂಣಿಂ ಉಪಾಸ್ ಪರ್ಗಟ್ ಕೆಲೊ ಆನಿ ನಾಬೊತಾಕ್ ಲೊಕಾ ಮಧೆಂ ಎಕಾ ಪ್ರಧಾನ್ ಸ್ಥಾನಾರ್ ಬಸಯ್ಲೊ.
13. ದೋಗ್ ದುಷ್ಟ್ ಮನಿಸ್ ಆಯ್ಲೆ ಆನಿ ತೆ ತಾಚೆ ಮುಕಾರ್ ಬಸ್ಲೆ. ತಾಂಣಿಂ ಲೊಕಾ ಮುಕಾರ್ ನಾಬೊತಾಚೆರ್ ಹೊ ಅಪ್ರಾಧ್ ಮಾಂಡ್ಲೊ: “ನಾಬೊತಾನ್ ದೆವಾಚೆರ್ ಆನಿ ಲೊಕಾಚೆರ್ ಶಿರಾಪ್ ಘಾಲಾ.” ತಾಂಣಿಂ ತಾಕಾ ಶಹರಾಂತ್ಲೊ ಭಾಯ್ರ್ ವ್ಹೆಲೊ ಆನಿ ತಾಕಾ ಫಾತ್ರಾವ್ನ್ ಜಿವ್ಶಿಂ ಮಾರ‍್ಲೊ.
14. ಉಪ್ರಾಂತ್ ತಾಂಣಿಂ ನಾಬೊತಾಕ್ ಫಾತ್ರಾವ್ನ್ ಜಿವ್ಶಿಂ ಮಾರ‍್ಲಾ ಮ್ಹಣ್ ಜೆಜೆಬೆಲಾಕ್ ಖಬರ್ ಧಾಡ್ಲಿ.
15. ನಾಬೊತಾಕ್ ಫಾತ್ರಾವ್ನ್ ಜಿವ್ಶಿಂ ಮಾರ‍್ಲಾ ಮ್ಹಣ್ ಆಯ್ಕತಚ್, ಜೆಜೆಬೆಲಾನ್ ಆಹಾಬಾಕ್ ಮ್ಹಳೆಂ: “ಊಟ್ ಆನಿ ನಾಬೊತಾನ್ ತುಕಾ ಪಯ್ಶಾಂಕ್ ದಿಂವ್ಕ್ ಇನ್ಕಾರ್ ಕೆಲ್ಲೊ ತೊ ದಾಕಾಂಮಳೊ ಸ್ವಾಧೀನ್ ಕರ್; ಕಿತ್ಯಾಕ್ ನಾಬೊತ್ ಜಿವಂತ್ ನಾ, ತೊ ಮೆಲಾ.”
16. ನಾಬೊತ್ ಮೆಲಾ ಮ್ಹಣ್ ಆಯ್ಕುನ್ ಆಹಾಬ್ ಉಟ್ಲೊ ಆನಿ ಜೆಜ್ರೆಯೆಲಾಚ್ಯಾ ನಾಬೊತಾಚೊ ದಾಕಾಂಮಳೊ ಆಪ್ಣಾ ಆಧೀನ್ ಕರುಂಕ್ ತೊ ಥಂಯ್ ಗೆಲೊ.
17. ತೆದ್ನಾ ಸರ್ವೆಸ್ಪರಾನ್ ತಿಶ್ಬೆಚ್ಯಾ ಎಲೀಯಾ ಕಡೆ ಉಲೊವ್ನ್ ಮ್ಹಳೆಂ:
18. “ಸಾಮಾರಿಯಾಂತ್ ರಾಜ್ವಟ್ಕಿ ಚಲಯ್ತಲ್ಯಾ ಇಸ್ರಾಯೆಲಾಚ್ಯಾ ರಾಯಾ ಆಹಾಬಾಕ್ ಮೆಳುಂಕ್ ವಚ್. ತೊ ಆಪ್ಣೆಂ ಸ್ವಾಧೀನ್ ಕೆಲ್ಲ್ಯಾ ನಾಬೊತಾಚ್ಯಾ ದಾಕಾಂಮಳ್ಯಾಂತ್ ಆಸ್ತಲೊ.
19. ತುಂ ತಾಕಾ ಅಶೆಂ ಸಾಂಗ್: ‘ಅಶೆಂ ಮ್ಹಣ್ತಾ ಸರ್ವೆಸ್ಪರ್: ತುವೆಂ ಖುನ್ ಕರುನ್ ದಾಯ್ಜ್ ಸ್ವಾಧೀನ್ ಕೆಲೆಂಯ್‌ಮೂ?’” ಆನಿ ಫುಡೆಂ ಉಲೊವ್ನ್ ತಾಕಾ ಸಾಂಗ್: “ಅಶೆಂ ಮ್ಹಣ್ತಾ ಸರ್ವೆಸ್ಪರ್: ಜ್ಯಾ ಜಾಗ್ಯಾರ್ ಸುಣ್ಯಾಂನಿ ನಾಬೊತಾಚೆಂ ರಗತ್ ಲೆಂವ್ಲಾಂ, ತ್ಯಾಚ್ ಜಾಗ್ಯಾರ್ ತುಜೆಂಯ್ ರಗತ್ ತಿಂ ಲೆಂವ್ತಲಿಂ.”
20. ಆಹಾಬಾನ್ ಎಲೀಯಾಕ್ ಮ್ಹಳೆಂ: ಅರೇ, ಮ್ಹಜ್ಯಾ ದುಸ್ಮಾನಾ, ತುವೆಂ ಮ್ಹಾಕಾ ಸೊಧುನ್ ಕಾಡ್ಲೊಯ್?” ಎಲೀಯಾನ್ ತಾಕಾ ಜಾಪ್ ದಿಲಿ: “ವ್ಹಯ್, ಹಾಂವೆಂ ತುಕಾ ಸೊಧುನ್ ಕಾಡ್ಲೊ. ಸರ್ವೆಸ್ಪರಾಚ್ಯಾ ದೊಳ್ಯಾಂ ಮುಕಾರ್ ವಾಯ್ಟ್ ತುವೆಂ ಕೆಲೆಂಯ್ ದೆಕುನ್,
21. ಹಾಂವ್ ತುಜೆರ್ ವಿಘ್ನಾಂ ಧಾಡ್ತಲೊಂ; ಹಾಂವ್ ತುಜೊ ನಾಸ್ ಕರ‍್ತಲೊಂ ಆನಿ ಆಹಾಬಾಚ್ಯಾ ವಂಶಾಚ್ಯಾ ಹರೇಕ್ ದಾದ್ಲ್ಯಾಕ್, ಜಾಂವ್ ತೊ ಗುಲಾಮ್, ಜಾಂವ್ ತೊ ಸ್ವತಂತ್ರಿ, ಇಸ್ರಾಯೆಲಾ ಮಧ್ಲೊ ಕಾಡುನ್ ನಪಯ್ತ್ ಕರ‍್ತಲೊಂ.
22. ತುವೆಂ ಮ್ಹಾಕಾ ರಾಗ್ ಹಾಡಯ್ಲೊಯ್ ಆನಿ ಇಸ್ರಾಯೆಲಾಕ್ ಪಾತ್ಕಾಕ್ ವಡ್ಲೊಯ್ ದೆಕುನ್, ಜೆಂ ಹಾಂವೆಂ ನೇಬಾಟಾಚ್ಯಾ ಪುತಾ ಜೆರೊಬೊವಾಮಾಚ್ಯಾ ಘರಾಣ್ಯಾಕ್ ಆನಿ ಅಹೀಜಾಚ್ಯಾ ಪುತಾ ಬಾಶಾಚ್ಯಾ ಘರಾಣ್ಯಾಕ್ ಕೆಲೆಂ, ತೆಂ ಹಾಂವ್ ತುಜ್ಯಾ ಘರಾಣ್ಯಾಕ್‌ಯೀ ಕರ‍್ತಲೊಂ.
23. ಆನಿ ಜೆಜೆಬೆಲಾ ವಿಶ್ಯಾಂತ್‌ಯೀ ಸರ್ವೆಸ್ಪರಾನ್ ಮ್ಹಳೆಂ: ‘ಜೆಜ್ರೆಯೆಲಾಚ್ಯಾ ಪಾಗಾರಾ ಕಡೆ ಸುಣಿಂ ಜೆಜೆಬೆಲಾಕ್ ಗ್ರಾಸಿತಲಿಂ.’
24. ಆಹಾಬಾಚ್ಯಾ ವಂಶಾಚೊ ಕೊಣ್‌ಯೀ ಶಹರಾಂತ್ ಮರತ್ ಜಾಲ್ಯಾರ್ ಸುಣಿಂ ತಾಕಾ ಗ್ರಾಸಿತಲಿಂ; ತಾಂಚೆ ಮಧ್ಲೊ ಕೊಣ್‌ಯೀ ಶೆತಾಂತ್ ಮರತ್ ಜಾಲ್ಯಾರ್ ಆಕಾಸಾಚಿಂ ಸುಕ್ಣಿಂ ತಾಕಾ ಗ್ರಾಸಿತಲಿಂ;
25. ಆಹಾಬಾನ್ ಆಪ್ಲೆ ಪತಿಣಿ ಜೆಜೆಬೆಲಾಚ್ಯಾ ಭುಲೊಂವ್ಣ್ಯಾಕ್ ಕಾನ್ ದಿವ್ನ್ ಸರ್ವೆಸ್ಪರಾಚೆ ದಿಷ್ಟಿಕ್ ವಾಯ್ಟ್ ದಿಸ್ತಾ ತೆಂ ಕೆಲ್ಲೆ ಪರಿಂ ಹೆರ್ ಕೊಣೆಂಚ್ ಕೆಲ್ಲೆಂ ನಾ.
26. ತಾಣೆಂ ಖರೆಂಚ್ ಕಾಂಟಾಳ್ಯಾಚ್ಯೊ ಕರ‍್ಣ್ಯೊ ಕೆಲ್ಯೊ: ಸರ್ವೆಸ್ಪರಾನ್ ಇಸ್ರಾಯೆಲಿತಾಂ ಮುಕ್ಲೆ ಧಾಂವ್ಡಾಯ್‌ಲ್ಲ್ಯಾ ಆಮೊರಿತಾಂನಿ ಕೆಲ್ಲೆ ಪರಿಂ ತಾಣೆಂ ದೇವ್‌ಮೂರ್ತಿಂಚೊ ಪಾಟ್ಲಾವ್ ಕೆಲೊ.
27. ಆಹಾಬಾನ್ ಹಿಂ ಉತ್ರಾಂ ಆಯ್ಕುನ್ ಆಪ್ಲಿಂ ವಸ್ತ್ರಾಂ ಪಿಂಜ್ಲಿಂ, ಆಪ್ಲೆ ವಿಣ್ಗೆ ಕುಡಿಚೆರ್ ತೊ ಗೊಣಿಯೆವಸ್ತ್ರಾಂ ನ್ಹೆಸ್ಲೊ, ತಾಣೆಂ ಉಪಾಸ್ ಕೆಲೊ, ಗೊಣಿಯೆವಸ್ತ್ರಾಂನಿಚ್ ನಿದ್ಲೊ ಆನಿ ಖಂತಿನ್ ಬುಡೊನ್ ಹೆಣೆಂ ತೆಣೆಂ ಭೊಂವ್ಲೊ.
28. ತೆದ್ನಾ ಸರ್ವೆಸ್ಪರಾನ್ ತಿಶ್ಬೆಚ್ಯಾ ಎಲೀಯಾ ಕಡೆ ಉಲೊವ್ನ್ ಮ್ಹಳೆಂ: “ಆಹಾಬ್ ಮ್ಹಜೆ ಮುಕಾರ್ ಕಿತ್ಲೊ ಖಾಲ್ತೊ ಜಾಲಾ ಮ್ಹಣ್ ತುವೆಂ ಪಳೆಲೆಂಮೂ? ತೊ ಮ್ಹಜೆ ಮುಕಾರ್ ಖಾಲ್ತೊ ಜಾಲೊ ದೆಕುನ್ ಹಾಂವ್ ತಾಚ್ಯಾ ಕಾಳಾರ್ ವಿಘ್ನಾಂ ಧಾಡ್ಚೊ ನಾಂ. ತಾಚ್ಯಾ ಪುತಾಚ್ಯಾ ಕಾಳಾರ್ ಹಾಂವ್ ತಾಚ್ಯಾ ಘರಾಣ್ಯಾಚೆರ್ ವಿಘ್ನಾಂ ಧಾಡ್ತಲೊಂ.”

************** **************

22 ಅರಾಮ್‌ಗಾರಾಂ ವಿರೋಧ್ ಝುಜ್, ಆಹಾಬಾಚೆಂ ಮರಣ್
1. ತೀನ್ ವರ‍್ಸಾಂ ಅರಾಮ್ ಆನಿ ಇಸ್ರಾಯೆಲಾ ಮಧೆಂ ಝುಜ್ ನಾತ್ಲೆಂ.
2. ಪೂಣ್ ತಿಸ್ರ್ಯಾ ವರ‍್ಸಾ ಜುದಾಚೊ ರಾಯ್ ಜೆಹೊಶಾಪಾಟ್ ಇಸ್ರಾಯೆಲಾಚ್ಯಾ ರಾಯಾಶಿಂ ಆಯ್ಲೊ,
3. ಆನಿ ಇಸ್ರಾಯೆಲಾಚ್ಯಾ ರಾಯಾನ್ ಆಪ್ಲ್ಯಾ ಸೆವಕಾಂಕ್ ಮ್ಹಳೆಂ: “ರಾಮೊತ್-ಗಿಲೆಯಾದ್ ಆಮ್ಚೆಂ ಮ್ಹಣ್ ತುಮಿ ಜಾಣಾಂತ್. ತರೀ ತೆಂ ಅರಾಮಾಚ್ಯಾ ರಾಯಾಚ್ಯಾ ಹಾತಾಂತ್ಲೆಂ ಪಾಟಿಂ ಘೆಂವ್ಕ್ ಆಮಿ ಕಾಂಯ್ಚ್ ಕರಿನಾಂವ್.”
4. ಆನಿ ತಾಣೆಂ ಜೆಹೊಶಾಪಾಟಾಕ್ ಮ್ಹಳೆಂ: “ಮ್ಹಜೆ ಸವೆಂ ರಾಮೊತ್-ಗಿಲೆಯಾದಾ ವಿರೋಧ್ ಝುಜ್ ಮಾಂಡುಂಕ್ ತುಂ ತಯಾರ್ ಆಸಾಯ್?” ಹಾಣೆಂ ಇಸ್ರಾಯೆಲಾಚ್ಯಾ ರಾಯಾಕ್ ಜಾಪ್ ದಿಲಿ: “ಹಾಂವ್ ತುಜೆ ಸವೆಂ ಝುಜಾಕ್ ದೆಂವ್ತಲೊಂ, ಮ್ಹಜೊ ಲೋಕ್ ತುಜ್ಯಾ ಲೊಕಾ ಸವೆಂ, ಮ್ಹಜೆ ಘೊಡೆ ತುಜ್ಯಾ ಘೊಡ್ಯಾಂಸವೆಂ.”
5. ಪೂಣ್ ಜೆಹೊಶಾಪಾಟಾನ್ ಇಸ್ರಾಯೆಲಾಚ್ಯಾ ರಾಯಾಕ್ ಸಾಂಗ್ಲೆಂ: “ಪಯ್ಲೆಂ ಸರ್ವೆಸ್ಪರಾಚಿ ಆe ಕಿತೆಂ ಮ್ಹಣ್ ಸಮ್ಜುನ್ ಘೆ!”
6. ಇಸ್ರಾಯೆಲಾಚ್ಯಾ ರಾಯಾನ್ ಪ್ರವಾದ್ಯಾಂಕ್ ಎಕ್ಟಾಂಯ್ ಕೆಲೆ. ತೆ ಸುಮಾರ್ ಚಾರ‍್ಶಿಂ ಆಸ್ಲೆ. ತಾಣೆಂ ತಾಂಕಾಂ ವಿಚಾರ‍್ಲೆಂ: “ಹಾಂವೆಂ ರಾಮೊತ್-ಗಿಲೆಯಾದಾ ವಿರೋಧ್ ಝುಜಾಕ್ ದೆಂವುಂಕ್ ಜಾಯ್ ವಾ ತಿ ಆಲೊಚನ್ ಸೊಡುಂಕ್ ಜಾಯ್?” ತಾಂಣಿಂ ಜಾಪ್ ದಿಲಿ: “ಝುಜಾಕ್ ದೆಂವ್! ಸರ್ವೆಸ್ಪರ್ ತೆಂ ಶಹರ್ ತುಜೆ ಆಧೀನ್ ಕರ‍್ತಲೊ.”
7. ಪೂಣ್ ಜೆಹೊಶಾಪಾಟಾನ್ ವಿಚಾರ‍್ಲೆಂ: “ಆಮಿ ಸಲಹಾ ವಿಚಾರುಂಯೆತ್ ಜಾಲ್ಲೊ ಸರ್ವೆಸ್ಪರಾಚೊ ಹೆರ್ ಕೊಣ್‌ಯೀ ಪ್ರವಾದಿ ಹಾಂಗಾ ನಾ?”
8. ಇಸ್ರಾಯೆಲಾಚ್ಯಾ ರಾಯಾನ್ ಜಾಪ್ ದಿಲಿ: “ಎಕ್ಲೊ ಆಸಾ ಆನಿ ತಾಚೆ ಉದೆಶಿಂ ಆಮಿ ಸರ್ವೆಸ್ಪರಾಚಿ ಸಲಹಾ ಘೆವ್ಯೆತ್. ತೊ ಇಮ್ಲಾಚೊ ಪೂತ್ ಮಿಕಾಯಾ. ಪೂಣ್ ಹಾಂವ್ ತಾಕಾ ದ್ವೇಶಿತಾಂ, ಕಿತ್ಯಾಕ್ ತೊ ಪ್ರವಾದ್ ಕರುನ್ ಮ್ಹಾಕಾ ಅನರ್ಥ್ ಶಿವಾಯ್ ಬರೆಂ ಸಾಂಗಿನಾ.” ಜೆಹೊಶಾಪಾಟಾನ್ ಮ್ಹಳೆಂ: “ರಾಯ್ ತಶೆಂ ಸಾಂಗಿನಾ ಜಾಂವ್.”
9. ಉಪ್ರಾಂತ್ ಆಹಾಬಾನ್ ಎಕಾ ಅಧಿಕಾರ‍್ಯಾಕ್ ಆಪಯ್ಲೊ ಆನಿ ತಾಕಾ ಮ್ಹಳೆಂ: “ವಚ್ ಆನಿ ಇಮ್ಲಾಚ್ಯಾ ಪುತಾ ಮಿಕಾಯಾಕ್ ತುರ್ತಾನ್ ಹಾಂಗಾ ಆಪೊವ್ನ್ ಹಾಡ್.”
10. ಇಸ್ರಾಯೆಲಾಚೊ ರಾಯ್ ಆನಿ ಜುದಾಚೊ ರಾಯ್ ಜೆಹೊಶಾಪಾಟ್ ರಾಯಾಳ್ ಮುಸ್ತಾಯ್ಕಿ ನ್ಹೆಸುನ್ ಆಪ್ಲ್ಯಾ ಶಿಂವಾಸನಾಂರ್ ಬಸುನ್ ಆಸ್ಲೆ. ತೆ ಸಾಮಾರಿಯಾಚ್ಯಾ ದಾರ್ವಟ್ಯಾ ಕಡೆ ಮಳ್ಪಾಖಳ್ಯಾಂತ್ ಆಸ್‌ಲ್ಲೆ ಆನಿ ಸರ್ವ್ ಪ್ರವಾದಿ ತಾಂಚೆ ಮುಕಾರ್ ಪ್ರವಾದ್ ಕರ‍್ತಾಲೆ.
11. ಕೆನಾನಾಚ್ಯಾ ಪುತಾ ಜೆದೆಕೀಯಾನ್ ಆಪ್ಣಾಕ್ ಲೊಂಕ್ಡಾಚಿಂ ಶಿಂಗಾಂ ಕರಯ್ಲಿಂ ಆನಿ ತಾಣೆಂ ಮ್ಹಳೆಂ: “ಅಶೆಂ ಮ್ಹಣ್ತಾ ಸರ್ವೆಸ್ಪರ್: ‘ಅಸಲ್ಯಾ ಶಿಂಗಾಂನಿ ತುಂ ಅರಾಮ್‌ಗಾರಾಂಚೊ ನಾಸ್ ಜಾಯ್ಸರ್ ತಾಂಚೆ ಕಡೆ ಝುಜ್ತಲೊಯ್.”